Шүүхийн иргэдийн төлөөлөгчийн эрх зүйн байдлын тухай хуулийн үр нөлөөг сайжруулах, хэрэгжилтийн талаар олон нийтийн хэлэлцүүлэгт иргэдийн төлөөлөгч нарыг оролцуулах ажлын хүрээнд Өвөрхангай аймгийн Хархорин сум дахь Сум дундын шүүхийн Тамгын газраас иргэдийн төлөөлөгчид тангараг өргөх үйл ажиллагаа болон дүгнэлт гаргах ажиллагааны талаар ойлголт өгөх, шүүх хуралдааны явцыг үзүүлэх зорилгоор 2019 оны 11 дүгээр сарын 29-ний өдөр иргэдийн төлөөлөгчдөд үзүүлэх шүүх хуралдааныг тус шүүхийн байранд зохион байгууллаа. Үзүүлэх шүүх хуралдаанд Хархорин сумаас 2019 онд иргэдийн төлөөлөгчөөр сонгогдсон 6 иргэн, Хархорин сумын Засаг даргын тамгын газрын албан хаагчид оролцлоо.
Шүүх хуралдааны үеэр иргэдийн төлөөлөгчид тавигдах шаардлага, иргэдийн төлөөлөгчийн эрх, үүрэг, нөлөөллийн мэдүүлэг хэрхэн хөтлөх зэргийг сургалтаар тайлбарлан, шүүх хуралдааны үед иргэдийн төлөөлөгч тангараг өргөх ажиллагаа болон дүгнэлт гаргах явцын талаар үзүүллээ.
Тус ажиллагаанд эвлэрүүлэн зуучлагч Д.Цэдэн тайлбар уншиж, шүүх бүрэлдэхүүнд шүүгчийн туслах Т.Лхагвасүрэн, Б.Хулангоо, бичиг хүргэгч Г.Норлохсүрэн, шүүх хуралдааны нарийн бичгийн даргад шүүгчийн туслах Д.Цэвэлмаа, иргэдийн төлөөлөгчид шүүх хуралдааны нарийн бичгийн дарга А.Батцог, улсын яллагчид шүүгчийн туслах Д.Дуламсүрэн, шүүгдэгчид галч Э.Батмөнх, хохирогчид үйлчлэгч Д.Ганболор, өмгөөлөгчид ерөнхий нягтлан бодогч Б.Отгонжаргал, нярав Н.Мөнхнасан нар оролцлоо.
Өвөрхангай аймгийн Хархорин сум дахь Сум дундын шүүхийн Тамгын газар
